Directorate of Science & Technology, Govt. of Mizoram buatsaihin dt 12.05.2026 khan Lunglei Science Centre, Zohnuai Auditorium-ah National Technology Day (NTD) lawm a ni a, sorkar mi pawimawhte leh zirlaite nen hun hman a ni. He ni puala hun hmanah hian Mizoram Polytechnic, Baptist HSS, D & D HSS, Holy Faith School bakah Venglai naupangte nen hun hman a ni a. National Technology Day, 2026 lawmna hi Pu R. Lalrochama, Member, Lunglei High-Powered Committee chuan khuallian Pu V. Malsawmtluanga, MLA & Vice-Chairman, High-Powered Committee aiawhin hun a hmanpui a. Pu R. Lalrochama chuan Technology lama thang chak leh changkang apiangte hi ram changkang leh hmasawn an ni a ti a, Mizoram pawh hian hmalakna tur tam tak kan neih thu sawiin, ei leh bara intodelh ram kan nihna turin technology changkang hmanga kan lo neih dante kan her rem a ngai a, chumi a thlen theihna tur chuan Science & Technology lama thawktute leh innovators ten tan an lak deuh deuh a apawimawh thu a a sawi bawk.
Pu H. Lalsawmliana, Chief Scientific Officer, Dte. of Science & Technology chuan hun a kaihruai a, National Technology Day hi kumtinin ram pumah lawm anih thin thu sawiin, kum 1999-a India sorkarin ama pual liau liau a thil ropui tak tak a tih ni hraitrengna hun atan May 11 apiangin hun hman anih thin thu a sawi.Indigenous technology hmanga siam Hansa-3 trainer aircraft a thlawh tir hmasak ber ni, Trishul missile kahchhuah hmasak berna ni leh Pokhran-II, Rajasthan-a nuclear test nei a nuclear nei khawvel ram tlemte zinga a tel tanna ni anih thu a sawi a. He hunah hian India ram pumpuia zirlai naupangte leh mipui nawlpui te zingah zau zawk a technology puandarhna ni pawimawh atana hman thin anih thu Pu H. Lalsawmliana chuan a sawi.
NTD lawmna ah hian Pu Edward Lalzuiliana, Scientific Officer, DST chuan 'Responsible Innovation for Inclusive Growth' tih thupui hmangin thu a sawi a, Pu K. Lalrammawia, Principal Scientific Officer, DST chuan lawmthu sawiin, he huna tel zawng zawng leh sawmbik official zawng zawngte chungah lawmthu sawiin hun a khar ani.
