LUNGLEI; the 6th October,2023: Vawiin chhun dar 12:00 khan Lunglei Science Centre & Digital Planetarium, Zohnuai, Lunglei chu Dr.Vanlaltanpuia, MLA & Chairman, Mizoram Youth Commission chuan a hawng.
Thu sawiin Khuallian, Dr.Vanlaltanpuia,MLA & Chairman, Mizoram Youth Commission chuan Mizoram-a Science Centre pahnihna tur Lunglei Science Centre & Digital Planetarium peihfel a ni ta hi a lawmawm hle a ni a ti a. Lunglei District tana ni chhinchhiah tlak leh thil pawimawh tak niin, Mizoram chhim lam zirlai naupangte tan science zirna puitu hmun pawimawh tak leh mipui vantlangte zingah pawh science hriatchianna kawnga hmasawnna thlen tir tur a nih a beisei thu a sawi a. India ram state dangte bakah ramdangte hmasawnna ke pen ruala pen ve turin Lunglei leh a chhehvel District-te a duhsak thu a sawi a ni.
Lunglei Science Centre & Digital Planetarium hawnna programme hi Pu Lalmalsawma Pachuau, Secretary, Planning & Programme Implementation Department (Science & Technology) chuan a kaihruai a. Science & Technology Department changtu Minister Pu Zoramthanga, Chief Minister zahawm tak duhsakna changa, Dte. of Science & Technology ten Lunglei Science Centre & Digital Planetarium hawn theih a an lo peih ta hi lawmawm a tih thu a sawi a. Khuallian leh kalkhawmte chungah lawmthu sawiin, tangkai taka he hmun hi hmang turin Lunglei mipuite a chah bawk. Rev. Dr.R.Lalthanmawia, Associate General Secretary, BCM, Lunglei chuan Lunglei Science Centre & Digital Planetarium hawn thar chu Pathian hnena hlanna hunserh a hmang a ni.
Er. H. Lalsawmliana, Chief Scientific Officer, Dte. of Science & Technlogy & Member Secretary, Mizoram Science Centre & Mizoram Science, Technology Innovation Council (MISTIC) pawhin report pek paha thu sawiin Lunglei Science Centre hi cheng nuai 697 senga Mizoram sawrkarin a din a ni, a ti a. Digital Planetarium hi Dte. of Science & Technology hnuaia awm Mizoram Science, Technology & Innovation Council (MISTIC) hmalakna a cheng nuai 330 senga din niin, North Eastern Council atangin sum hmuh a ni, a ti a.
He project enkawltu Pi Malsawmdawngliani, Sr. Executive Engineer, PWD Building Project Division, Lunglei pawhin project bul an tan atanga a tawp thlenga hma lak a nih chhoh dan report kimchang tak a pein, Science Centre leh Digital Planetarium hi Contractor Pu KT.Nghawra,Zohnuai Lunglei in a sa a, Landscaping hi Department in an thawk a, Science Centre hi Mizoram PWD design leh estimate a ni a, Digital Planetarium hi Kothari & Associate, Kolkota ten an design a, Landscaping hi Creative Museum Designer, National Council of Science Museum, Kolkata design a ni thung. Science Centre hian Type-II quarters 2 a chhawm tel a, total floor area hi 766.43Sqm a ni.
Digital Plentarium-ah hian Astronomy Exhibition Hall,Conference Hall leh Training Hall a awm nghal a, total Floor Area hi 456Sqm a ni.Digital Planetarium Dome hi 8m diameter niin, seating capacity of 50 a ni.
Lunglei Science Centre & Digital Planetarium hawnna programme hi Lunglei a sawrkar mi pawimawh tak takte leh zirna in hrang hranga hotu leh thawktuten an hmanpui a. MUP, MHIP, YMA, Kohhran aiawhte leh chanchinbumiten an hmanpui bawk a ni. He hawnna programme a kalkhawmte hi YMA Sub Hqrs, Zaipawl, Lunglei ten thiam takin zaiin an awi a. Pu F. Lalramchuana, Sr. Scientific Officer, Dte. of Science & Technology & Senior Curator, Mizoram Science Centre chuan lawmthu sawiin hun a khar a ni.
